Hdmi arc و Hdmi earc الفرق بينهم و طريقة إستخدامهم

Hdmi arc  و Hdmi earc  و هما بيلخبطو شويه الناس وهى بتشترى تلفزيون او home theatre
او DVD player جديد و خاصتا لو كنت ما اشتريتش الأجهزه دى من زمان و مش متابع التطورات
التيكنولوجيه الجديده فى الأجهزه دي و أول مره تشتريها.

معنى Hdmi arc و Hdmi earc

كلمه  HDMI  اللى أكيد كلنا سمعناها و عارفينها هى إختصار لى كلمه High-Definition
Multimedia Interface و معناها الواجهه متعددة الوسائط عالية الوضوح  
و هي وصلة بتستخدم لنقل صورة الفيديو بشكل غير مضغوط والصوت بشكل مضغوط أو غير مضغوط
 و تم تصميم الكابل و المنفذ ده  علشان يكون
البديل ال ديجيتال للكابلات الأنالوج بتاعة زمان زى مثلا وصلة الأوديو فيديو اللى كلنا عارفينها  

وال HDMI عموما ليه تاريخ طويل لأنه بيستخدم من 17 سنه تقريبا  لحد دلوقتى بعد ما تم طرح التيكنولوجى
دى فى سوق المستهلك الأوروبى سنة 2003  وطبعا دخل عليها تطورات كثير خلال الفتره دى كاحال اى
حاجه بتتطور و تمت زيادة مواصفات كثير كمواصفات اساسيه فى أصدارات ال HDMI  المختلفة بدايتا
من ال HDMI 1.0 مرورا بي 1.2 و 1.3 و HDMI 1.4  و حاليا  HDMI 2.0 و أخيرا
ال HDMI 2.1 اللى ابتدى يظهر من 2019  و 2020

اما كلمه HDMI ARC إختصار لى  Audio return channel  يعنى (قناة عودة الصوت) و هو
بروتوكول ذكي يندرج ضمن المواصفات الاساسيه لل  HDMI  بدايتا من إصدار ال HDMI 1.4

HDMI eArc  إختصار لى Enhanced audio return channel او قناة عودة الصوت
المحسنه و هى الجيل الجديد و الأحدث من بروتوكول ال HDMI arc  و من المواصفات الأساسيه لى إصدار
HDMI 2.1 و بعض الأجهزة القليله اللي بتدعم البروتوكول ده على منفذ ال HDMI 2.0

امتي ابقى محتاج Hdmi arc و Hdmi earc؟

فعلشان اجاوبك على السؤال ده لازم في الأول تحدد هل إنت هاتسمع الصوت من التلفزيون و لا من ال ساوند
بار لأنك لو هاتسمع الصوت من التلفزيون بس زى ما أغلب الناس بتعمل كده فا فى الحاله دى إنت مش محتاج
ال HDMI arc  فى اى حاجه و لكن لو مش عايز تسمع صوت التلفزيون الوحش و عايزتوصله بالساوند بار
او ال Av reciver علشان تسمع صوتهم الحلو يبقى في الحاله دى إنت هاتحتاج حل من أثنين يا منفذ
ال HDMI arc  يا مخرج الصوت الأوبتيكال لو تلفزيونك ما فيهوش مدخل HDMI ARC و هقولكم إيه
مزايا و عيوب كل طريقه دلوقتى بس هاديلكم مثال على كلامى علشان تكون الرؤيه اوضح

طريقة إستخدام Hdmi arc و Hdmi earc

دلوقتى إنت عندك تلفزيون و ريسيفر ال satellite  او بي إن سبورت او اى ريسيفر عموما و عندك
بلاى ستيشن و DVD player و ساوند بار او AV reciver و عايز توصل الحاجات دى ببعض
علشان فى الأخر تسمع الصوت الحلو بتاعهم على الهوم ثيتر   فالحاجات دى كلها علشان تتوصل ببعض
ليها طريقتين

الطريقه الأولى :

و هى إنك توصل الريسيفر و البلاى ستيشن و ال DVD player على التلفزيون و فى الحاله دى التلفزيون
هيبقى ال Hub  او المحور المركزى اللى بيستقبل الصوت اللى جايله من الأجهزه دى و بينقله للساوند بار
عن طريق إنك توصله بكابل ال HDMI من منفذ HDMI arc و بيكون مكتوب عليه ARC و علشان
كده بيتقال عليها قناة عودة الصوت  

الطريقه دى ليها ميزتين

اول  ميزة إنك هاتقدر تختار ال المصدر او ال Source  اللي شغال  على التلفزيون إذا كان
ال DVD player  ولا البلاي ستيشن ولا رسيفر الدش بكل سهوله  من ريموت التلفزيون 

 و تانى ميزه و هى إنك هاتقدر تستفيد من تقنيه ال CEC و هى إختصار لى Consumer electronic control  و التيكنولوجى دى بتخليك تتحكم فى قفل و فتح الساوند بار او تعلي و توطي الصوت من ريموت التلفزيون برده بس هاتحتاج تتأكد هل التلفزيون نفسه بيدعم التقنيه دى و لا لأ من كتالوج التلفزيون او بشويه
بحث على الإنترنت علشان أغلب موديلات 2020 و 2019 فيها الموضوع ده لاكن الموديلات الأقدم  أو
الأرخص سعرا شويه مش كلها بتدعم ال CEC

 و طبعا لو مفيش مدخل HDMI arc في التلفزيون فا مفيش قدامك غير مخرج الصوت الأوبتيكال و فى
الحاله دى  مش هاتستفيد بتقنيه ال CEC  و ده من عيوب إستخدام الكابل الأوبتيكال

والطريقة الثانيه لتوصيل الأجهزه دى ببعض

هي إنك توصل ال بلاي ستيشن و ال DVD player بالساوند بار او ال AV reciver  نفسه و في
الحاله دى هيبقى الساوند بار هو ال Hub المركزى اللى هينقل صورة  كل الحاجات دى للتلفزيون برده من
خلال منفذ ال HDMI Arc

عيوب الطريقه الثانيه

عيب الطريقة دى إنها هتخليك تستخدم ريموتين ريموت الساوند بار علشان تتنقل بين الأجهزه المختلفه و تتحكم فى الساوند بار و طبعا ريموت التلفزيون علشان تتحكم فى فتح و قفل التلفزيون و تشغيل التطبيقات المختلفه الموجوده عليه

لكن برده أجهزة الساوند بار الارخص سعرا شويه غالبا مش بيبقى فيها غير مدخل HDMI واحد و فى الحالة دى هاتستخدم الطريقة الأولى

مشكلة توصيل Hdmi arc و Hdmi earc مع الصوت المحيطي 5.1 و 7.1

كل ده كلام حلو و  كويس جدا فى حالة إن عندك ساوند بار او Home theatre  2.1 تشانل لكن لو
الساوند بار او الهوم ثيتر 5.1 تشانل او 7.1 تشانل يبقى هنا هاتبتدى اللخبطه الحقيقيه لأنك لو موصل
التلفزيون على مصدر او source  زى ال DVD player بيدعم الصوت الدولبى ديجيتال سيرروند 5.1
او ال DTS  سيررروند 5.1 فا غالبا التلفزيون مش هيبعت للساوند بار غير صوت 2 تشانل إلا إذا كان التلفزيون بيدعم خاصية ال 5.1  passthrough arc بمعنى إن مش كل التلفزيونات بتدعم تمرير الصوت ال 5.1 تشانل عبر مخرج ال HDMI arc و لازم نتاكد من كتالوج او مواصفات التلفزيون هل بيدعم الخاصيه دى ولا لأ او حتى نتواصل مع توكيل الشركه نفسه لو مالاقيناش حاجه مكتوبه فى الكتالوج او المواصفات متعلقة بالموضوع ده

و فى حالة إن التلفزيون مش بيدعم الخاصية دى يبقى هاتحتاج إنك توصل  التلفزيون بالساوند بار من خلال
مخرج الصوت الأوبتيكال اللي بيدعم الخاصيه دى في أغلب التلفزيونات او إنك توصل ال DVD player
بشكل مباشر على الساوند بار او ال AV reciver على طول

هل مدخل Hdmi arc و Hdmi earc يدعمو نقل إشارات الصوت DTSX و دولبى اتموس ؟

أما لو إنت بتتفرج على فيلم بصوت دولبى اتموس او DTSX من DVD player  يبقى فى الحالة دى إنت
مش هينفع معاك اي حاجه من الحلول اللي فاتت كلها و هنا هايجي دور مخرج ال HDMI earc او قناة اعادة
الصوت المحسنه لأن هي دي اللى بتدعم ملفات الصوت اللى بي Bandwidth عالى أو ملفات الصوت الغير مضغوط ال 5.1 و ال 7.1 زي ملفات الصوت الدولبى اتموس او الدولبى ترو إتش دى او ال DTSX و ال DTS hd master audio لأن مخرج ال  HDMI arc بس بيدعم ملفات الصوت المضغوط زى ال dolby digital  و ال Dolby digital + و ال DTS  فقط.

و برده لازم نتأكد هل التلفزيون نفسه بيعمل 5.1 Passthrough Earc  ولا لأ لأن في تلفزيونات بتعمل passthrough 5.1 لي الدولبى اتموس و ال DTSX و فى تلفزيونات بتعمل  ال passthrough لي الدولبى اتموس بس  او ال DTSX  بس.

كيف يتم نقل الصوت الدولبى اتموس عبر Hdmi arc ؟

و لاكن فى حاله واحده ممكن إنك تسمع فيها صوت دولبى اتموس من مخرج ال HDMI arc وهو إنه يكون مضغوط فى ملف Dolby digital+ زى ما بيحصل فى خدمات الأستريمينج المختلفه زى نتفليكس و الكلام
ده او فى بعض الجيمينج كونسولز زى ال Xbox one x

لاكن بالنسبه لى ال DVD player  فا هو فى أغلب الوقت بيستخدم الملفات الغير مضغوطه مع الدولبى أتموس و لذلك هانحتاج لمخرج ال HDMI Earc و لكن برده مخرج ال HDMI earc حديث نسبيا متوفر في أجهزه
قليله اوى دلوقتى

وجدير بالذكر إن لازم كل سلسله الأجهزة المتوصله ببعض تكون فيها HDMI arc  يعنى مش هينقع مثلا
توصل التلفزيون من ال HDMI arc على الساوند بار من مدخل ال HDMI  بس لأن كده مش هاتستقبل
اي صوت و لازم من مدخل ال HDMI arc  

و نفس الموضوع مع ال HDMI earc لانك لو وصلت تلفزيون بمخرج HDMI earc علي ساوند بار HDMI arc  بس  يبقى هاتستقبل صوت و لكن بالأمكانيات المحدوده لمدخل ال Arc مش الإمكانيات
الكامله لل Earc

و اللى حابب يعرف معلومات أكثر عن الصوت الدولبى اتموس و ال DTSX و الفرق بينهم فى مقالة خاصه بالموضوع ده إتكلمت فيه عن الفرق بينهم ممكن برده تطلع عليها

مواضيع ذات صله:

لمشاهدة فيديو أفضل 8 شاشات سمارت 43 بوصه إضغط هنا 

لمعرفة أفضل 8 شاشات سمارت 55 بوصه هنا 

إذا أردت متابعة مراجعات أحدث الأجهزه إضغط هنا

لمعرفة أفضل أنواع التكييفات في 2020 إضغط هنا