شاشات تلفزيون 2021 و 2022 هل تستحق الإنتظار أم الشراء أفضل الأن؟
شاشات تلفزيون 2021 نقطه مهمه أتسألت فيها كثير و هي هل تستحق فعلا الإنتظار سواء إذا كنت
هاتستخدمها لمشاهدة الأفلام و البرامج أو لعب الجيمز علي الجيمينج كونسولز الجديده أو حتي لو
هاستخدمها كامونيتور PC؟ و هل موديلات 2021 هاتكون احسن فعلا ولا لأ ؟ فا تابع معايا هذه المقاله
لمعرفة الإجابه على هذا السؤال.
لمعرفة الإجابه علي السؤال ده هانحتاج نشوف و نعرف ايه اخر الأخبار و التسريبات المتعلقه بموديلات
2021 و 2022 لسامسونج و ال جي و سونى و TCL و هل إذا كان فى تيكنولوجيات جديده هاتقدمها
الشركات دى لشاشات التلفزيون تستحق فعلا الإنتظار ولا لأ
و كمان محتاجين نعرف المشاكل اللى ظهرت فى شاشات السنادى 2020 اللى كانت سنه كارثيه بصراحه
على كافة المستويات لكل الناس و كانت كارثيه كمان بالنسبه لمصنعين شاشات التلفزيون اللى كانت أغلب
موديلاتهم أقل فى بعض مواصفاتها من موديلات السنه اللى فاتت و فيها مشاكل تقنيه هتكلم عنها دلوقتى
والإجابه المختصره للناس المستعجله و مش عايزه تكمل باقى المقاله هى استنى موديلات 2021 تنزل و
اشتري موديلات السنادي 2020 بسعر أرخص و هقولكم ليه دلوقتي سنة 2021 و 2022 هايكونو مجرد
فتره إنتقاليه من التيكنولوجيات المستخدمه فى كل الشاشات السنادى زى ال oled و الكيوليد و
ال MINI led الي التيكنولوجيات الجديده اللى مازالت تحت التطوير و التجارب زي ال Micro led و
ال QD oled و ال Dual cell و غيرهم من التقنيات الحديثه اللي هانشوفها السنين اللي جايه
شاشات تلفزيون 2021 من LG
فا دلوقتى أحدث الأخبار و التسريبات بتتكلم عن إن ال جي ابتديت تشتغل علي تراخيص الموديل الجديد 2021
من شاشات الأوليد اللي هايكون إسمه C1 و اللي واضح من خلال الأسم إن ال جي هاتغير أسماء موديلات
السنه الجديده و هاتستخدم الأرقام تاني بدل الحروف المستخدمه فى موديلات السنادي و هتبقى W1 و E1 و
B1 و C1
طبعا إحنا فى إنتظار الموديل الجديد ده و هنشوف هل ال جي قدرت فعلا تتغلب على التحديات و المشكلات اللى
واجهتها السنادى اللى على الرغم من وجود المشاكل دي إلا إنها مازالت مصنفه كأفضل شاشة تلفزيون فى 2020 لكل الإستخدامات.
مشاكل شاشات LG الحاليه و هل ستجد لها حلول فى شاشات تلفزيون 2021 ؟
زى طبعا أول مشكله مشهوره و معروفه لأغلب الناس الخاصة بال Burn in او أحتراق البيكسيلز و
تطبيعها على الشاشه مع عرض المحتوي الثابت لمدد زمنيه طويله و اللي كانت منتشره بشكل أكبر فى بدايه
ظهور موديلات ال oled فى 2016 و 2017 و قلت بشكل كبير فى موديل ال C9 فى 2019.
و ال جي حاولت تتغلب عليها أكثر فى موديل ال CX فى 2020 عن طريق إنها تقلل شدة سطوع الإضاءه
يعنى ال Peak brightness بتاع الشاشه كان أقل بنسبه بسيطه عن موديلات ال C9 علشان تطول من
عمرها الإفتراضى أكثر و ده بيخلي شدة سطوع الإضائه فيها صعب إنه يعدى ال 800 نيتس و دي تعتبر
نقطة ضعفها الوحيده في منافستها لشاشات ال LCD التقليديه اللي بتعدى ال 1000 نيتس بسهوله زى شاشة سامسونج
ال Q90T مثلا اللي ممكن توصل لي 1400 نيتس مع محتوي ال HDR
و في راي الشخصى إني شايف إن ال جي أقصى حاجه ممكن تعملها في ال C1 الجديده إنها تعلي إضاءه
الشاشه و تخليها مره ثانيه في مستوى ال C9 مش أكثر من كده علشان ما تقللش من عمرها الإفتراضى و
لذلك ما اعتقدش إنها هاتكون حاجه مهمه لدرجة إني استني الموديل الجديد
ثانى مشكلتين فى شاشات ال جي و هل هتتغلب عليها فى شاشات تلفزيون 2021 ؟
اما تاني مشكلتين مع ال CX السنادي كانو متعلقين بالجيمينج و اولهم هو إنهم حددو ال Bandwidth
لمداخل ال HDMI 2.1 لي 40 جيجا بايت فى الثانيه مش الباند ويدث الكامل لمواصفات ال HDMI2.1
و هو 48 جيجا بايت في الثانيه و اللي كان موضوع محبط لكثير من الناس لأن السرعه كانت كامله بالفعل
فى موديل 2019 ال C9 والمفترض إن الموديلات الجديده تكون اعلي مش أقل
ولكن في كل الأحوال هي مش مشكله كبيره لأن برده الإكس بوكس سيريس إكس مدخل ال HDMI2.1 فيه
سرعته إتحددت لي 40 جيجا بايت في الثانيه و حتي ال PS5 إتحدد لي 32 جيجا بايت في الثانيه لكن
الفكره
فى الموضوع ده بالنسبه لأي جيمر أو حد بيحب ال Electronics إنه هايبقى عايز يشترى حاجه متكامله
ما تكونش ناقصه حاجه لأن إنت فى الأخر بتبقى عايز تستثمر فلوسك اللي هاتدفعها دى أفضل إستثمار
و المشكله الثانيه المتعلقه بالجيمينج فى شاشات ال CX و باقى موديلات الأوليد من ال جي السنادي و اللي
ما قدرناش نعرفها غير بعد ما ابتدينا نجرب ال HDMI 2.1 بشكل فعلي بعد صدور PS5 و
XBOX SERIES X و اسمها ال Vrr shifted gamma او gamma shift اللي ظهرت
مع بعض الجيمرز فى الألعاب اللي بتكون فيها مشاهد شديدة الظلام بدقة 4k@120FPS مع ال VRR
إختصارا لى Variable refresh rate سواء إذا كان AMD Free sync او Invidia Gsync و المشكله دي بتخلى درجات اللون الأسود بهته و مجربه شويه او شكلها غريب ومش مظبوطه وهي مشكله تقنيه
مش هندخل فى تفاصيلها اوي بس متعلقه بطريقة صناعة بانل الأوليد نفسها كا هارد وير و مدى التوافق بتاعه
مع سوفت وير ال VRR
هل يوجد حل لمشكله VRR ؟
لكن لسه لحد دلوقتى مافيش حل ليها من خلال فيرم وير ابديت و طبعا كل دى هاتكون تحديات قدام ال جي فى 2021 و هانشوف هل هاتقدر تقدم حلول ليها ولا لأ فى موديل ال C1 و حتي لو قدمو
حلول ليها فا هي أصلا ما تعتبرش مشاكل خرافيه يعنى بالنسبه لأغلب الناس تخليها ما تشتريش موديلات
السنادى بسعر أحسن السنه اللي جايه بالأخص الناس اللى إستخداماتها للشاشه بعيده عن الجيمز و مجرد بيتفرجو
علي افلام و برامج او حتي بيلعبوجيمز على خفيف
و ده كان بالنسبه لي ال جي اللى بالتأكيد شغاله علي تيكنولوجيز جديده لتحسين اداء الأوليد و لكن كلها لسه مجرد أبحاث و تجارب ما داخلتش حيز التصنيع بشكل فعلي و ماعتقدش برده هايكون في جديد عندهم في خلال السنتين اللي جايين على مستوى شاشات الأوليد غير إنهم يصلحو المشاكل اللي عندهم حاليا و كمان لازم يقدمو أسعار منافسه و أرخص من السنه دي و ده لو عايزين يستمرو فى المنافسه الشرسه ليهم من شاشات ال LCD التقليديه اللي ابتديت تتطور بشكل كبير فى ادئها و ابتديت تقرب من جودة صورة الأوليد و يمكن أهم حاجه ممكن يعملوها السنتين اللى جايين بالنسبه لشاشتهم ال lcd التقليديه سواء النانو سيل او ال UHD أنهم يستخدمو معاها تيكنولوجي النور الجديده الميني ليد اللي ابتدت تستخدمها TCL بدل الليد العادي فى بعض موديلاتها الفلاج شيب السنادى و السنه اللي فاتت و اللي هاتكلم عنها أكثر دلوقتى
ماذا ستفعل سامسونج فى شاشات تلفزيون 2021؟
لأن كمان كل المصنعين مستنين بشكل فعلى يشوفو سامسونج هاتعمل ايه جديد او ايه الإتجاه بتاعهم و هل هيعملو زيها ولا هايكملو فى طريقهم الخاص بيهم و ده بسبب إن سامسونج فى 2020 كانت مكتسحه كل الشركات على مستوى المكاسب اللى عملتها من مبيعات شاشات التلفزيون او علي مستوي عدد الشاشات اللي باعتها بالأخص كمان مع موضوع الكرونا اللي قعدنا كلنا في البيت و بالطبع خلا الطلب يزيد علي شاشات التلفزيون و غير كده سامسونج شغاله بالفعل علي أكثر من تيكنولوجيا جديده هاتكلم عنها دلوقتي فا طبيعى إن باقى الشركات تستني و تشوف إتجاه أكبر شركه فى العالم علي مستوي المبيعات هاتشتغل علي ايه و بعدين يقررو هما هيعملو ايه
تيكنولوجي ميني ليد Mini led
طيب حلو جدا نتكلم دلوقتى عن أحدث تيكنولوجي موجوده علي الساحه و هى الميني ليد اللي أبتديت تستخدمها TCL فعلا السنه اللي فاتت في الفئه ال ثامنه من شاشاتهم و في الفئه السادسه السنادي و كان ليها السبق في
استخدام التيكنولوجي دى عن باقي الشركات فا ايه هو المينى ليد و إيه الجديد إيه اللي ممكن يقدمهولنا ؟ فالمينى
ليد بإختصار برده هو تيكنولوجي بتستبدل اللمبات الليد الموجوده في الشاشات حاليا بلمبات حجمها أصغر بكثيير جدا و اللي بتخليها تطور فكره ال Full array local dimming الموجوده في الشاشات دلوقتي اللي بتقسم النور ده لزونز او مجموعات تقدر تتحكم في نورها بشكا منفصل و عدد المجموعات دى بيكون اقل كثير من
شاشات الميني ليد اللي بيقدر يخلي عدد المجموعات ده يوصل لأكثر من 1000 مجموعه و ده عدد رهيب طبعا بالنسبه لى ال Fullarray local dimming التقليدي اللي ممكن يوصل ل 500 مجموعه بالكثير.
ما الهدف من هذه التيكنولوجيات الجديده فى شاشات تلفزيون 2021 ؟
و كل التيكنولوجيات الجديده دي عموما هدفها واحد في الأخر و هو إنك تاخد منها تجربه مشاهده أفضل و مبهره
أكثر بالأخص في الغرف شديدة الإضاءه عن طريق إضاءه أقوى أو الغرف المظلمه عن طريق كونتراست
ريشيو أعلي و شدة وضوح تفاصيل أحسن مع درجات لون أسود أشد عمقا و بلومينج أقل
و لكن مازالت برده التيكنولوجيا دي بتواجه بعض الصعوبات زي سعرها المرتفع جدا بالأخص لو الشاشه دي هاتكون للجيمز, زى ما شفنا مثلا مونيتور ال PC بتاعة Acer predator x32 الميني ليد و اللي بيوصل
عدد الزونز او مجموعات النور فيها لى 1152 مجموعه بقوة إضاءه 1400 نيتس لكن سعرها حوالى 3000 دولار لمقاس 32 بوصه فانتو متخيلين يا جماعه علشان يكون فيه شاشه ميني ليد بنفس المواصفات دي للجيمز مقاس 55 بوصه مثلا من شركه زي ال جي او سامسونج ماعتقدش ثمنها هيقل عن 5 او 6 الاف دولار لأن
حتي شاشات TCL الميني ليد اللي تعتبر سعرها رخيص كان عدد الزونز فيها أقل من مونيتور acer
TCL اول الشركات فى استخدام تيكنولوجي ميني ليد Mini led
يعنى الفئه الثامنه من شاشة TCL السنادى عدد الزونز او مجموعات اللمبات فيها متقسم لى 1000 زون
تقريبا و سعرها بيبتدى من 2000 دولار لمقاس ال 65 بوصه لكنها متوفره أكثر فى امريكا و استراليا و
الصين و مش متوفره فى الوطن العربي و كذلك الفئه السادسه مواصفاتها اقل بكثير و مجموعات اللمبات فيها متقسمه ل 240 مجموعه و ثمنها حوالي 650 دولار لمقاس ال 55 بوصه فعلشان سامسونج او ال جي يعملو
شاشه مينى ليد تكون فلاج شيب ليهم و فيها أكثر من 1000 زون فا بالتأكيد هايكون سعرها غالى جدا لكن
يعنى احنا مع بعض و لسه هانشوف ايه اللى هايحصل
وعلي الرغم من إن شاشات TCL الميني ليد كان فعلا نورها أقوي و مبهره أكثر لكن في مشكله ظهرت فيها معروفه باسم ال Black crushing يعنى بمفهومنا العربي نقدر نقول ان درجات الإسود فيها اسود بغشوميه
او اسود بزياده يعنى في بعض الصور اللي بتكون فيها مشاهد ظلمه و في نفس الوقت فيها تفاصيل صغيره اوي واخده نور فاماكانتش بتبان في السواد و التفاصيل دي كانت بتضيع شويه و لذلك حتي سامسونج لو نزلت شاشات mini led فعلا السنه اللي جايه وارد جدا بشكل كبير إنها تواجه نفس المشكله لأنها لسه ما لحقتش تشتغل علي تطوير التيكنولوجيا دي في مصانعهم الخاصه و كمان سامسونج ما اشتغلتش فى موضوع الميني ليد ده قبل كده
سواء فى شاشات التلفزيون او مونيتورز ال PC
و ده بالأخص كمان بعد التسريبات و الأخبار اللى بتقول إن سامسونج أبتديت تتعاقد السنادى مع شركة Epstar فى تايوان و اللي تعتبر أكبر مصنع في العالم دلوقتى بيصنع بانل الباكلايت الميني ليد و بيبعها لأبل و ال Asus و غيرهم و هاسيبلكم فى صندوق الوصف لينكات الأخبار
دي لو حابين تطلعو عليها.
ما هي التيكنولوجيات الجديده فى شاشات تلفزيون 2021 اللي لسه ما نعرفهاش او هتعمل تغيير جزري في صناعة شاشات ال LCD اللي ممكن ننتظرها او تستتاهل إننا نشتريها ؟
و النقطه دي كانت عامله صراع داخل شركة سامسونج نفسها علي التقنيات الجديده اللي هايستخدموها الفتره اللي جايه لأن شركه سامسونج متقسمه لجزئين منفصلين و هما Samsung Display و هي الشركه القائمه علي تطوير و إكتشاف التيكنولوجيات الجديده في صناعة الشاشات و بتبيعها لي القسم التاني من شركة سامسونج و هو Samsung Electronics او بتبيعها لغيرها من الشركات زى سونى و ال جي و غيرهم من الشركات
وسامسونج Electronics هي المسئوله عن تصنيع الشاشات بالتكنولوجيات دي بشكل فعلي و بيعها للجمهور و كان فيه صراع بينهم لأن سامسونج Display كانت شغاله علي تيكنولوجي ال QD-oled و اللي بإختصار
عباره عن نفس فكرة شاشات الأوليد في ال جى مع تزويد فلتر كوانتم دوت بدل الفلتر اللي ال جي بتستخدمه
دلوقتي مع بعض التحسينات اللى مفترض تعالج عيب إحتراق البيكسيلز
اما سامسونج Electronics اللي شايفه إنها تيكنولوجي مش هتقدم جديد علي مستوى قوة الإضاءه لأنها في النهايه معتمده علي نور الأوليد بيعيوبه اللي عرفناها دلوقتي و شايفه إنها تشتغل علي تيكنولوجي ال QD-Ned او ال QD-neo و إن ده هيكون احسنلهم و اللي مفترض إنها هاتكون تغيير جزرى في صناعة شاشات التلفزيون
فعلا لأنها هاتستبدل فلتر ال LCD او الكريستال الساءل و فلتر الألوان و البولريزر الموجودين دلوقتى و
هاتستخدم مكنهم فلتر الوان كوانتم دوت و هاتشيل اللمبات الليد او الميني ليد و هاتستخدم مكانهم nano rod led و هي شكل تاني من أشكال ال mini led.
ما هي أخر الأخبار من مؤتمر شاشات التلفزيون المنعقد فى كوريا بخصوص شاشات تلفزيون 2021 ؟
لكن اخيرا قدرنا نعرف كامستهلكين من مؤتمر شاشات التلفزيون او ال TV Summit اللي كان منعقد في
كوريا من حوالي اسبوع إن الصراع ده انتهي فعلا علي إن سامسونج Electronics و ضحت فيه إن السنتين اللي جايين 2021 و 2022 ها يكونو بالنسبه ليها بمثابة سنتين إنتقاليين من مرحلة ال LCD التقليدي و هاتشتغل فيهم علي تيكنولوجي ال MINI led كا تحسين للشاشات الموجوده بالفعل دلوقتى , يعنى خلاص كده موضوع ال QD-oled ده لبس في حيطه و إن سنة 2023 هاتكون بدايه التغيير الجزري ليها في صناعة الشاشات علي متجهز مصانعها و خطوط إنتاجها لتيكنولوجي ال QD-neo او QD-ned
لذلك في إعتقادى الشخصى إن إحنا في الوقت الحالي تقريبا واصلين لأحسن مرحله في شاشات ال LCD و حتي لو في تطويرات حصلت السنتين اللي جايين هاتكون كلها تطويرات بسيطه أو إن إحنا هانبقي بنشتري شاشات من الي سامسونج بتقول عليها فتره إنتقاليه و سامسونج هايكون هدفها في السنتين دول إنهم يخلصو فيهم من الأستوك الموجود من الشاشات اللي عندهم دلوقتي حتي لو طورو فيها شويه تطويرات بسيطه او إنهم يخلو كل حاجه 8K و تبقي الشاشات ال 8K منتشره أكثر بسعر أحسن لحد ما يظبطو امورهم للجيل الجديد من شاشات التلفزيون فى 2023
هل شاشات سامسونج الحاليه تواجه مشاكل تقنيه ؟
سامسونج كمان ما كانش عندها مشاكل مهمه تذكرفى شاشاتهم السنادي أكثر من إن برده أداء ال VRR المدعوم من AMDfree sync ما كانش الأفضل بالإضافه لإن سامسونج كانت بخيله السنادي فى عدد مداخل ال HDMI 2.1 و كانو حاطين مدخل واحد يتيم و برده كانو محددين سرعته لي 40 جيجا بايت في الثانيه في مقابل 4
مداخل فى شاشه ال جي CX فانتمني إنهم يزودو عدد المداخل ال HDMI 2.1 و يبقو على الأقل 3 مداخل في موديلات 2021 لأن فى ناس كثير دلوقتى عندهم PS5 و Xbox series X و بيحتاجو يشغلو الجهازين من
غير ما يبدلو الكابلات او يجيبو اسبليتر و الكلام ده و كمان أغلب موديلات الكيوليد السنادي كانت أقل فى أدائها
من موديلات السنه اللي فاتت فا نتمني نشوف أداء اعلي السنه اللي جايه مش اقل
طيب أخر حاجه السؤال اللي بيطرح نفسه سونى هاتعمل ايه في الحرب دي بالأخص إن ما فيش اي أخبار عن توجهاتهم في شاشات التلفزيون الفتره اللي جايه لكن اللي نقدر نستنجه من الكلام اللي فات إن إذا سامسونج و
ال جي إتجهو السنتين اللي جايين لي الميني ليد زي TCL يبقى سوني هاتكون في ورطه كبيره لو ما عامالتش
زيهم و
فضله تستخدم نفس التيكنولوجي الحاليه و هاتكون اقل من باقى المنافسين و لذلك انا راي إن شاشات السنه
الجديده ممكن ما تفرقش كثير عن شاشات السنادى و إن الإنتظار هايكون أفضل في كل الأحوال لأنك يا
هاتشتري شاشه من الموديلات الجديده لو كان أدائها أحسن فعلا بسعر غالي يا هاتشتري موديلات السنادي
بسعر أرخص.
مشاهدة فيديو أفضل 8 شاشات سمارت 43 بوصه إضغط هنا
لمعرفة أفضل 8 شاشات سمارت 55 بوصه هنا
إذا أردت متابعة مراجعات أحدث الأجهزه إضغط هنا
لمعرفة أفضل أنواع التكييفات في 2020 إضغط هنا
